Chegou o día das graduacións dos e das que cambian de etapa. O grupo de 6º de EI celebran que despois do verán empezan a primaria "no cole grande", e as e os de 6º de EP que marchan para o instituto. Grandes cambios cheos de emocións encontradas: nervios, ilusións, nostalxia, soños..
Aquí vos deixamos algunha imaxe dos e das recén graduadas posando e actuando, que a música non pode faltar en ningunha celebración.
Esta mañá representamos as obras de teatro que estivemos preparando intensamente nas últimas semanas. Cada unha delas era un conto clásico revisitado para poñer en valor algún obxectivo de desenvolvemento sostible. Tratamos a contaminación acústica, a importancia do consumo responsable, o dano que nos fan os químicos.. aprendemos moitísimo e gozamos unha barbaridade!
Esta mañá tivemos a inmensa sorte de recibir a visita de Ramón Corral, neto de Antón Corral, representando o Obradoiro da súa familia. Tivo a xenerosidade de amosarnos cómo se constrúen as gaitas, requintas, pitos e zanfonas; de ensinarnos diferentes madeiras, a evolución dun toco de madeira a unha peza dun instrumento, a diferenza tímbrica entre os instrumentos.. Tamén tocou unha peza acompañado por algunhas das pandeireteiras que temos entre as alumnas. E o que máis nos gustou de todo: respondeu todas as nosas preguntas e deixounos probar varios destes instrumentos.
Hoxe recibimos a visita de Susa Herrera. Somos moi afortunados/as de ter aprendido tantas cancións súas, todas as publicadas e moitísimas das sen publicar. Agradecémosllo moitas veces nos vídeos, pero foi moito mellor darlle as grazas cantando e bailando en directo algunhas das que máis nos gustan: o koala, o morcego, a cebra.. e darlle bicos e apertas. A ela fíxolle moita ilusión e nós pasámolo fenomenal.
Enmarcada nas actividades do Congreso Educativo EDUCODS2025, a banda xuvenil de Tui preparou un espectáculo con dous actores/cantantes e pediu colaboración aos centros de primaria de Tui para formar un coro. Do noso cole apuntáronse nenas e nenos de todos os cursos. Ensaiamos as cancións no cole durante o mes de maio, nalgúns proxectos lectores. A representación foi o xoves 5 de xuño ás 18:30h na Praza de Abastos. A verdade é que saíu fenomenal.
Este ano, entre a meteoroloxía e tantas actividades que organizamos durante o mes de maio, quedounos a celebración dos Maios para a última semana. Agardamos por ela pero compensou, tivemos un precioso día solleiro para lucir a nosa roupa branca de primavera adornada con pampullos, e pasámolo moi ben.
Como viñamos facendo nos últimos anos, o grupo de 5º e 6º de EP cantou as coplas compostas en clase de Lingua Galega durante as últimas semanas, e o de 4º de EP bailou a Danza de Paus. Saíulles fenomenal!!
Levamos toda a semana de celebración, e hoxe foi o día grande, cun programa de radio escolar adicado ás cantareiras e á tradición oral e varias actuacións. Fixérono fenomenal todos os grupos:
Infantil interpretando unha cantiga popular sobre os oficios.
3º e 4º de EP lucindo outra composición de Susa con diferentes coplas das cantareiras, acompañándose tamén dunhas fabulosas pandeireteiras.
Mirade qué cousiñas tan chulas nos regalou o Equipo de TICS!
As pandeiretas son imáns para colocar no frigo ou na superficie metálica que queiramos, e as tarrañolas.. son para a aula de música, xa as probamos case todos os cursos, pero hai que tomalo con calma, que non soan o primeiro día.. hai que practicar!! 😅
Moitas grazas, profes!! Encántannos 💙💙
Esta semana non paramos!! Hoxe recibimos a Nerea e Paula, cantareiras e pandeireteiras dende os 4 e 2 anos respectivamente na ACF Tarambainas de Vigo. Marabilláronnos as súas voces e engaioláronnos cantando cantigas de berce, de oficios.. tocando unha chea de artiluxios de cociña, ensinándonos a tocalos nós..
Non poden gustarnos máis!! Queremos que volvan!!
