O curso rematou

 Dende o Equipo de Dinamización da Lingua Galega desexámosvos.. Moi bo verán!!! E que gocedes da vosa lingua!! 👋 🏝 🏄 👅🎵

GRADUACIÓNS

Chegou o día das graduacións dos e das que cambian de etapa. O grupo de 6º de EI celebran que despois do verán empezan a primaria "no cole grande", e as e os de 6º de EP que marchan para o instituto. Grandes cambios cheos de emocións encontradas: nervios, ilusións, nostalxia, soños.. 

Aquí vos deixamos algunha imaxe dos e das recén graduadas posando e actuando, que a música non pode faltar en ningunha celebración.

 

RAMÓN CORRAL

Esta mañá tivemos a inmensa sorte de recibir a visita de Ramón Corral, neto de Antón Corral, representando o Obradoiro da súa familia. Tivo a xenerosidade de amosarnos cómo se constrúen as gaitas, requintas, pitos e zanfonas; de ensinarnos diferentes madeiras, a evolución dun toco de madeira a unha peza dun instrumento, a diferenza tímbrica entre os instrumentos.. Tamén tocou unha peza acompañado por algunhas das pandeireteiras que temos entre as alumnas. E o que máis nos gustou de todo: respondeu todas as nosas preguntas e deixounos probar varios destes instrumentos.

SUSA HERRERA

 Hoxe recibimos a visita de Susa Herrera. Somos moi afortunados/as de ter aprendido tantas cancións súas, todas as publicadas e moitísimas das sen publicar. Agradecémosllo moitas veces nos vídeos, pero foi moito mellor darlle as grazas cantando e bailando en directo algunhas das que máis nos gustan: o koala, o morcego, a cebra.. e darlle bicos e apertas. A ela fíxolle moita ilusión e nós pasámolo fenomenal.

 

ANIMALIA

 Enmarcada nas actividades do Congreso Educativo EDUCODS2025, a banda xuvenil de Tui preparou un espectáculo con dous actores/cantantes e pediu colaboración aos centros de primaria de Tui para formar un coro. Do noso cole apuntáronse nenas e nenos de todos os cursos. Ensaiamos as cancións no cole durante o mes de maio, nalgúns proxectos lectores. A representación foi o xoves 5 de xuño ás 18:30h na Praza de Abastos. A verdade é que saíu fenomenal.

CONGRESO EDUCODS2025

 Onte participamos no V Congreso EducODS2025  organizado polo CEIP Nº1 de Tui en colaboración co Concello. Puxemos un posto na corredeira onde ensinabamos o que aprendemos do oficio de cestería. Suso viu con nós e estivo axudándonos todo o tempo.

Tamén expuxemos os traballos que fixemos para a clase de ciencias, nos que empregamos a electricidade para crear cidades e comunidades sostibles, e cos que traballamos a competencia STEM e a competencia emprendedora.

OBRADOIRO DE CESTERÍA

 A mañá do venres 30 de maio o grupo de 5º e 6º de EP dedicoulla a aprender a construír cestas e cestos, a coñecer os materiais cos que se elaboran e cómo domealos para obter fantásticos resultados. Ensináronnos Suso e Elena, avós dun dos alumnos do centro, con moitísima paciencia e dedicación. Encantounos e sóubonos a pouco, porque quédanos tanto por saber..

CANTAREIRAS NO NOSO COLE

Esta semana non paramos!! Hoxe recibimos a Nerea e Paula, cantareiras e pandeireteiras dende os 4 e 2 anos respectivamente na ACF Tarambainas de Vigo. Marabilláronnos as súas voces e engaioláronnos cantando cantigas de berce, de oficios.. tocando unha chea de artiluxios de cociña, ensinándonos a tocalos nós.. 

Non poden gustarnos máis!! Queremos que volvan!!

CIDADES E COMUNIDADES SOSTIBLES

 "Cidades e comunidades sostibles" é o título do proxecto de centro que escollemos para este curso escolar. É un proxecto transversal e interdisciplinar que queriamos que estivese relacionado cos ODS (Obxectivos de desenvolvemento sostible). Participamos en moitas actividades arredor do proxecto, unha delas foi facer a dobraxe en lingua galega deste vídeo por parte dos cursos de 3º e 4º de EP.

 

 

SEMANA DA PRENSA

 Empezamos marzo coa semana da prensa, este ano con noticias relacionadas co noso proxecto de "Cidades e comunidades sostibles".

Participou o alumnado de todos os niveis de EI e EP. Aquí vos deixamos algúns dos resultados expostos polos corredores do centro.

ENTROIDO

 Levamos toda a semana de troula, e hoxe non paramos. Entre os obradoiros de pintar as caras, o de facer filloas, os de baile, pulseiras, máscaras.. e o desfile.. quedounos un Entroido sostible ben xeitoso.