Esta mañá representamos as obras de teatro que estivemos preparando intensamente nas últimas semanas. Cada unha delas era un conto clásico revisitado para poñer en valor algún obxectivo de desenvolvemento sostible. Tratamos a contaminación acústica, a importancia do consumo responsable, o dano que nos fan os químicos.. aprendemos moitísimo e gozamos unha barbaridade!
Hoxe recibimos a visita de Susa Herrera. Somos moi afortunados/as de ter aprendido tantas cancións súas, todas as publicadas e moitísimas das sen publicar. Agradecémosllo moitas veces nos vídeos, pero foi moito mellor darlle as grazas cantando e bailando en directo algunhas das que máis nos gustan: o koala, o morcego, a cebra.. e darlle bicos e apertas. A ela fíxolle moita ilusión e nós pasámolo fenomenal.
Enmarcada nas actividades do Congreso Educativo EDUCODS2025, a banda xuvenil de Tui preparou un espectáculo con dous actores/cantantes e pediu colaboración aos centros de primaria de Tui para formar un coro. Do noso cole apuntáronse nenas e nenos de todos os cursos. Ensaiamos as cancións no cole durante o mes de maio, nalgúns proxectos lectores. A representación foi o xoves 5 de xuño ás 18:30h na Praza de Abastos. A verdade é que saíu fenomenal.
Onte participamos no V Congreso EducODS2025 organizado polo CEIP Nº1 de Tui en colaboración co Concello. Puxemos un posto na corredeira onde ensinabamos o que aprendemos do oficio de cestería. Suso viu con nós e estivo axudándonos todo o tempo.
Tamén expuxemos os traballos que fixemos para a clase de ciencias, nos que empregamos a electricidade para crear cidades e comunidades sostibles, e cos que traballamos a competencia STEM e a competencia emprendedora.
"Cidades e comunidades sostibles" é o título do proxecto de centro que escollemos para este curso escolar. É un proxecto transversal e interdisciplinar que queriamos que estivese relacionado cos ODS (Obxectivos de desenvolvemento sostible). Participamos en moitas actividades arredor do proxecto, unha delas foi facer a dobraxe en lingua galega deste vídeo por parte dos cursos de 3º e 4º de EP.
Empezamos marzo coa semana da prensa, este ano con noticias relacionadas co noso proxecto de "Cidades e comunidades sostibles".
Participou o alumnado de todos os niveis de EI e EP. Aquí vos deixamos algúns dos resultados expostos polos corredores do centro.
Levamos toda a semana de troula, e hoxe non paramos. Entre os obradoiros de pintar as caras, o de facer filloas, os de baile, pulseiras, máscaras.. e o desfile.. quedounos un Entroido sostible ben xeitoso.
Para o Día da Paz, o 30 de xaneiro, este ano preparamos a canción “Fronteiras” de Guadi Galego, que cantamos e acompañamos con xestos todo o alumnado do centro no vestíbulo do edificio principal. Quedounos ben fermoso!
Ao ser un día especial aproveitamos para facer o segundo acompañamento lector deste curso, e ao rematar a canción, as compañeiras e compañeiros de Educación Infantil, recitaron un poema de Paz que tamén lles saíu fenomenal.
Como resumo do día de hoxe queremos dicirvos que desexamos que todos os días sexan Día da Paz 💙💚💛💜
Esta mañá o alumnado de 1º, 2º e 3º de EP xunto cos seus mestres e mestras achegáronse á residencia Paz y Bien de Tui. Foron visitar ás persoas maiores que viven alí, cantáronlles as panxoliñas que aprenderon en clase de música, cantaron algunhas outras con eles/as e intercambiaron postais por agasallos. Foi unha fermosa xornada de convivencia.
.jpg)
